Češka razmatra protjerivanje ruskih diplomata nakon što je Britanija preduzela takve korake kao odgovor na napad na ruskog dvostrukog špijuna u Engleskoj, rekao je u petak češki premijer Andrej Babiš.
Lideri EU podržali su Britaniju na samitu u četvrtak, kriveći Moskvu za napad nervnim agensom.
Babiš je rekao novinarima da će on u ponedeljak, 26. marta razmotriti protjerivanje diplomata sa ministrom spoljnih poslova i drugim članovima Vlade, dodajući da postoji mogućnost da će Prag slijediti primjer Londona.
"Mi to razmatramo", rekao je Babiš na pitanje o mogućnosti protjerivanja ruskih diplomata.
On je rekao da će broj diplomata biti jednocifren, a ne u desetinama, i neće uključivati ambasadora.
Češka je uvučena u spor oko slučaja "Skripalj" nakon što je portaprol ruskog Ministarstva spoljnih poslova rekla prošlog vikenda da je najizgledniji izvor "novičoka", nervnog agensa koji je korišten u napadu u Solsberiju, sama Britanija ili Češka, Slovačka, Švedska ili SAD.
Češka je ove navode oštro odbacila, a ministar spoljnih poslova Martin Stropnicki pozvao je zbog toga ruskog ambasadora na razgovor.
